Itoobiya oo digniin culus ka soo saartay hubkii Masar
Xukuumadda federaalka Itoobiya ayaa ka digay in hubka la geeyey Soomaaliya uu uga sii dari karo colaadda, loona weecin karo argagixisada, sida ay sheegtay warbaahinta gudaha ee dalkaasi.
Wasiirka arrimaha dibadda Itoobiya ayaa shaaca ka dhigay in xaaladda ammaan uu hubkaasi qatar ku yahay.
Hadalkiisa ayaa yimid maalin kadib markii markab laga leeyahay dalka Masar uu hub culus ka soo dejiyay Muqdisho, taasi oo aheyd shixnaddii labaad oo hub ah muddo bil gudaheed, kaddib heshiis amni oo ay Soomaaliya iyo Masar kala saxiixdeen.
Wasiirka arrimaha dibadda Itoobiya Taye Atske Selassie ayaa sheegay in uu ka walaacsan yahay in saadka rasaasta ay bixinayaan xoggagga shisheeye uu sii xumeyn doono ammaanka jilicsan, kuna dhammaan doono gacanta argagixisada Soomaaliya, sida ay tebisay wakaaladda wararka Itoobiya.
Geesta kale, wasaaradda Arrimaha dibadda ee Masar ayaa xaqiijisay keenista hubka, iyadoo sheegtay in shixnaddan looga dan leeyahay in lagu taageero dadaallada Soomaaliya ee lagu xoojinayo ammaanka, la-dagaallanka argagixisada, iyo ilaalinta madax-bannaanideeda.
Xiriirka Soomaaliya iyo Itoobiya ayaa xumaaday kadib markii Addis-Ababa ay heshiis afgarad la saxiixatay Somaliland bishii Janaayo ee sanadkaan, kaasoo xukuumadda Addis Ababa looga kireynayo dhul badeed 20 km ah, loogana beddelanayo in ay aqoonsatao Somaliland.
Muqdisho, Soomaaliya
Shabakadda GalmudugMirror
