DF oo shir muhiim ah kaga qeyb gashay Washington
Qaar kamid ah dowladaha caalamka, ayaa markii labaad carrabka ku adkeeyay, in madaxbannaanida dhuleed iyo tan cireedba ee Soomaaliya ay tahay mid lama taabtaan ah.
Dowladdaha Qatar, Turkiga, Imaaraadka Carabta, Ingiriiska iyo Mareykanka ee la isku yiraahdo QUINT ee Soomaaliya ka taageera dhinaca Ammaanka ayaa kulan ay ku yeesheen magaalada Washington ee dalka Mareykanka, waxay mar kale ku celiyeen inay lama taabtaan tahay Madaxbannaanida Jamhuuriyadda Federaalka Soomaaliya iyo midnimada dhuleed, waxayna isku raaceen inay ka soo horjeedaan wax kasta oo qal qal iyo xasilooni daro ka abuuri kara Geeska Afrika.
Wadamadan ayaa sidoo kale dowladda Turkiga ku bogaadiyay dadaalada ay ku doonayso inay ku dajiso xaalada xilli Turkiga uu marti galiyay labo shir oo loo qabtay Soomaaliya iyo Itoobiya, shirarkaas oo dowladda Soomaaliya ay ku cadaysay mowqifkeeda ah in aysan ka gor gortamayn in Itoobiya ay ka laabato damaceeda xadgudubka ah.
Kulankaan ayaa waxaa ka qayb galay masuuliyiin ka tirsan dowladda Federaalka ah, iyadoo lagu soo dhoweeyay dadaalada dowladda Soomaaliya ee ku aadan diyaarinta iyo isku dabaridada ciidan Qaranka oo lagula xisaabtami karo xasiloonida wadanka.
Dhanka kale kulanka inta uu socday ayaa looga hadlay baahida deg dega ah ee loo qabo in la dhamaystiro qorshayaasha cusub ee howlgalka xasilinta iyo taageerada Midowga Afrika ee Soomaaliya si loo soo afjaro howlgalka ATMIS ee Midowga Afrika ee Soomaaliya.
Ugu dambeyntii, Wadamadaan Soomaaliya ka caawiya dhinaca Amniga ayaa isku raacay shirka xiga oo ah shireka 8-aad in lagu qabto magaalada Muqdisho ee caasimada Soomaaliya.
Xafiiska Muqdisho
Shabakadda Galmudugmirror
