MW hore Farmaajo oo Garoowe lagu soo dhoweeyay
Madaxweynihii hore ee dowladda Federaalka Soomaaliya mudane Maxamed Cabdullaahi Farmaajo iyo wefdi uu hoggaaminayo ayaa maanta soo gaaray magaalada Garoowe, ee caasimadda Puntland.
Maxamed Farmaajo Madaxweyne hore oo ka soo amba-baxay magaalada Muqdisho, waxaa safarka ku wehelinayay xildhibaanno ka tirsan labada aqal ee Baarlamanka Federaalka Soomaaliya iyo siyaasiyiin kale.
Madaxweynaha Puntland Mudane Siciid Cabdullaahi Deni oo ay wehliyaan masuuliyiin ka tirsan labada gole ee dowladdiisa, ayaa garoonka diyaaradaha ee Garoowe kusoo dhoweeyay Madaxweynihii hore ee dalka Farmaajo iyo wefdigiisa, sida ay sheegtay Madaxtooyada Puntland.
“Madaxweynaha Dowladda Puntland Mudane Siciid Cabdullaahi Deni, ayaa garoonka diyaaradaha ee Garoowe kusoo dhoweeyay Madaxweynihii hore ee Soomaaliya Mudane Maxamed Cabdullaahi Farmaajo iyo wafdi uu hoggaaminayo” ayaa lagu yiri Qoraal ka soo baxay Madaxtooyada Puntland.
Dhinaca kale, wararka ayaa sheegaya in Madaxweyne hore Farmaajo uu Garoowe u yimid Arrimaha la xiriira Khilaafka Siyaasadeed ee ka taagan hannaanka ay Villa Somalia u waddo Wax ka beddelka Dastuurka KMG ah ee dalka, oo ay si weyn u diidan yihiin Deni iyo Farmaajo.
GalmudugMirror
Garoowe, Puntland
