Sanaag: Rabshado khasaare dhaliyay oo dhacay
Warar dheeraad ah ayaa ka soo baxaya rabshado geystay khasaare oo ka dhacay degmada Badhan ee gobolka Sanaag.
Inta la xaqiijiyay, Hal qof oo rayid ah ayaa ku geeriyooday mid kalena waa ku dhaawacmay kadib muddaharaad rabshado wata oo ka dhacay degmada Badhan.
24-kii saac ee la soo dhaafay, xiisad ayaa ka taagan magaalada Badhan kadib markii ciidamada Puntland is hor-taag ku sameeyeen ciidamo ay wateen rag sheegtay guddiga siyaasadda Maakhir oo uu hoggaaminayay xildhibaan hore Cabdiraxmaan Dhoorre.
Sidoo kale iska hor-imaad ka dhacay degmada Badhan ayaa waxaa ku dhaawacmay laba askari oo ka tirsan ciidamada Puntland kuwaasi oo loo la cararay goobaha caafimaadka Badhan.
Wararka ayaa sheegaya in ay hadda gudaha degmada Badhan ku sugan yihiin raggii la baxay guddiga siyaasadda Maakhir ee uu hoggaaminayay xildhibaan hore Cabdiraxmaan Dhoorre.
Waxgaradka magaalada ayaa sidoo kale wada waan-waan ay ku dejinayaan xaaladda degmada Badhan islamarkaaana Labada dhinac weli ma jiro mid ka hadlay xiisadda.
Xafiiska Garoowe
Shabakadda GalmudugMirror
